«FII PE VAL – kullan erindeki malları» kampaniyası Komratta geçti. Bu iniţiativa milli uurunda geçer,doorulu tutturmaa iş adamnarını hem erindeki malların kullanmasını.
«FII PE VAL – kullan erindeki malları» kampaniyası birleştirer iş adamnarını, kullanıcıları hem partnörları. Onun maanası kurulȇr onda, ki herbir yaşayan var nicä yardım etsin ekonomikayı ilerletmää,ayırarak erindeki mal yapmasını, urguladı orta hem küçük iş adamcılıın alyansın başı Liliana Busuyok: «Biz kurum,angısı temsil eder küçük hem orta biznesı milli uurda, da biz isteeriz birleştirmää hepsi iş adamnarını da onnarı ilerletmää,bizim biznesı, barabar yardım etmää bizim ekonomikaya ilerlemää».
Viţe-premyer, İnfrastruktura hem regional ilerlemesi ministrusu Vladimir Bolä urguladı,ani orta hem küçük biznesın ilerlemesi çok önemli, o oynȇȇr büük rolü devletin ekonomikasında.
«Benim bakışıma görä, bu önemli olayların birisi küçük biznesın tutturmasında, neçinki açan lafederiz ekonomika piramidası için, da saalıklı piramidanın temelindä lääzım olsunnar küçük iş adamnarı.Bunun için da lafedecez büün hem eni kolaylıklar için, tutturma deyni bölä iş adamnarını»,- Vladimir Bolä urguladı.
Gagauziyanın alış-veriş palatasının başı Mihail Paşalı urguladı,ani bölä iniţiativalar yardım ederlär kaavileştirmää ekonomika uurunu hem kurmaa eni kolaylıkları iş adamnarı için.
«Potenţial var bizim iş adamnarında, lääzım sade dooru yolları kurmaa.Biz lääzım yardım edelim bizim biznesa, nışannamaa, angı dooru yolda ilerlemää lääzım»,- Mihail Paşalı urguladı.
Erindeki iş adamnarı,angıları pay aldılar kampaniyanın sergisindä, urguladılar,ani bölä olaylar yardım ederlär onnara tanıtmaa kendi mallarını yaşayannara.
«Nekadar taa çok sergi,okadar taa çok insan annayacek,ani var kişilär, angıları işleerlär hem isteerlär çalışmaa onun için,ani var nicä yaşamaa hem işlemää ,kazanmaa evdä.Sanȇrım,ani bu en önemli.Zerä açan gidersin sınır aşırıya, orada diil senin evin».
Kampaniyanın sınırlarında taa geçri maasuz buluşmak erindeki iş adamnarınnan,doorulu ona,ki yardım etmää onnara ekonomika zorluklarını geçmää, eni koşullara sınaşmaa , tanıtmaa kendi mallarını da onnar taa uygun olsunnar kullanıcılara.