Komratta başarıldı Gagauziyanın açık çempionatı şahmata uurunda. İki günün içindä 100 pay alandan zeedä güreştilär çempion titulu için- en küçüklerdän sport masterlaradan.
İki günün süresindä pay alannar en küçüklerdän becerikli sportçularadan yaraştılar klasika hem şveyţar sistemindä vakıda görä. Bir zamana çalışan sport hem gençlik bakanı Pavel Tulba nışannadı, ani uşakların meraklıı bu yarışmalara büüyer.
Pavel Tulba bir zamana çalışan Gençlik hem sport bakanı: «Bu diil sade güreşmäk gramota için, ödül için. Bu yarışmak Gagauziya çempion titulu için. Bu sizin bütün yaşamanız. Verilecek sizin uşaklarınıza, unukalarınıza. Kim sä sizdän olacek çempion. Dilerim sizä ii başarlar».
Sport olayı belli etti diil sade en becerikleri, ama oldu önemni adım Gagauziyanın intelektual sportun ilerlemesindä, nışannadı regional şahmata hem şaşki okulun başı İvan Velikoglo. O sayȇr, ani bölä yarışmalar yardım ederlär kaldırmaa ustalıı, kaavileştirmää baalantıları sportçuların aralarında hem ilerlederlär şahmata oyunu gençlerin hem büüklerin aralarında. Hazırlayanların laflarına görä, yıl-yıldan pay alannarın sayısı diil sade Gagauziyadan, ama devletin başka dolaylarından da büüyer.
İvan Velikoglo Regional şaşki hem şahmata okulun başı: «Bizdä var çok filial, angıları işleerlär Çadırda, Aydarda, Kıpçakta. Biz pek sevineriz, neçinki bizdä bukadar uşak pay alȇr yarışmalarda, da çoyu ilk keret geldilär, da umutlanȇrım, ani her yıl onnarın sayısı zeedelenecek».
Herbir şahmata tablosunda sportçuların ardında durȇr trenerin işi. Nicä onnar urguladılar, yıl-yıldan belli olȇr, ani sportçuların becermekleri taa kaavi olȇrlar. İki günün içindä, yarışmalar verdilär kolaylık obyektiv notalamaa onnarın hazırlanmasını hem belli etmää en kaavileri.
«Bizim yarışmaların neetlerin birisi — bu dostlaştırmaa uşakları, oynamaa üüsek uurda, hem korumaa yapıları, odaları, neredä yapıldı remont işleri, şindi var plannarda dolayını da tertiplemää. Biz — bir en kaavi okulların birisi sayılȇrız, nicä çıkışlara görä, ölä dä tertip tarafından».
«Biz bütün yıl işledik uşaklarlan, ki gelmää Gagauziyanın çempionatına, da burada tarayıcıları ayıraceklar devlet yarışmalarına».
«Bän düşünerim, ani bu yarışmalar lääzım olsunnar uşakların aralarında, neçinki bu uşakların fikirlerini geliştirer, ki onnar taa ii annasınnar, nicä oynamaa şahmata».
«Bän söleyecäm, ani pek anılmış sport, neçinki geliştirer logikayı, intelektı, da çoyu analar- bobalar vererlär uşakları bu sporta».
Yarışmaların baş kahramannarı — şahmatistlär. Bakmadaan şüpelenmelerä, hem konkurenţiyaya, onnar üüsek uurda geçirerlär partiyaları da umutlanȇrlar kazanmaa üüsek çıkışları.
«Pek önemni pay almaa yarışmalarda, nicä Gagauziyanın çempionatı, çünkü gider hazırlanmak devlet yarışmalarına, angısı geçecek bu yakınnarda, burada yaraştırlar en kaavilär, hem belli ediler çempionnar».
«Konkurentlar pek kaavi, ama bän düşünerim, ani tarayacam».
«Pay almaktan sora bakȇrım yannışlıklarıma, başkasının da. Neçinki en ii sınışlar — bu praktika, erlem olmarsa praktika, nicä sän eni çıkışlara etişecän».
«Neçinki şahmatalar geliştirerlär fikirini, yardım ederlär okulda, geometriyada, matematikada. Bän isteerim olmaa programist».
Yarışmaların çıkışlarına görä en ii şahmatıstlär kablettilär diplomnarı, ödülleri hem para baaşışlarını. En önemni baaşış- kolaylık tanıttırmaa Gagauziyayı devlet uurunda, neredä bizim sportçular göstereceklär kendi becermeklerini. Hazırlayıcılar plannadılar 2026 yılda bir sıra olay regional hem devlet uurunda.