Gagauziyada heryılkı terbiedicilär ustacılıı yarışması başladı. «Yılın en ii terbiedicisi-2026» yarışmasında 18 uzman pay alȇr.
Bu yıl merak terbiedicilik yarışmasına zeedelendi: bu yıl ona katılmaa isteyennerin sayısı zeedelendi. 18 terbiedici Gagauziyanın türlü uşak başçalarından katılȇr. Üüredici zanaatına merak yıl-yıldan büüyer hem zamandaş metodların hem tehnologiyaların geliştirilmesi üürenmäk proţesindä taa sorumnu olȇr.
Nataliya Kristeva Gagauz Eri Üüretim bakanı: «Bu yarışmak herzaman pek gözäl duyguları brakȇr, hem en önemni o, ani bölä yarışmaklarda annȇȇrız, ani üüredicilik hem terbiedicilik zanaatının gelecää var. Hepsi pay alannnar bizim için artık enseyici oldular. Çünkü üüredicilii seçän insannarın cannarında uşakların tarafına büük sevgileri var».
«En ii terbiedici — 2025» konkursun tarayıcısı Olga Kazanji pay alannara danıştı.
Olga Kazanji «En ii terbiedici — 2025» konkursun tarayıcısı: «Bän dä onnar gibiyim. Bän dä bıldır onnar gibi dalgalanardım, düşünärdim nesoy kendi becermeklerimi gösteräbilecäm. Bu titul bana ihlam verdi. Var büük havezim zanaatımda ilerlemää».
Pay alannarın arasında var nicä genç üüredicilär, angıları bu uurda ilk adımnarını yapȇrlar, ölä dä onnar, kimileri yıllar boyunca şansora terbiedicilik uurunda işleerlär. İrina Keleş 2,5 yıl uşak başçasında işleer. Ama kendisinä emin hem biler, ani konkursun hepsi etaplarında başarılı olabilecek.Yarışmak birkaç etaptan kurulu. Onnarı geçärkenä üüredicilär lääzım olaceklar göstersinnär kendi becerikliini, incäzanaat uurunda ustacılıını hem uşaklarlan annaşabilmäk kolaylıklarını. Çıkışlara görä belli edileceklär en ii terbiedicilär, angıları şannı adları hem ödülleri kabledeceklär.“Yılın en ii terbiedicisi” yarışmasının pay alannarını Gagauziyanın uşak başçaları bekleerlär. Onnar yabancı kurumnarda hem grupalarda açık dersleri geçirsinnär lääzım. Bu etap yanvarin 29-da başlayacȇk. «Yılın en ii terbiedicisi» yarışması diil sade en becerikli uzmannarı belli eder, ama üüredicilik zanaatının prestijını üüselder, eni başarlara kalkmaa ihlam verer. Onnara, kim ilk erleri alacȇk, diplomnar hem para ödülleri verileceklär. 10 bin I-ci er için, 8 000 II-ci er için, hem dä III-cü er için — 5 000 ley. Finalistlerä sä ikişär bin ley verilecek.
Nataliya Kristeva Gagauz Eri Üüretim bakanı: «Onnar, kim tarayacȇk, Gagauz Erini Respublika uurnda geçirilän konkursunda temsil edeceklär. Var umudum, ani bu yıl da başarılı olacȇz. Bizim devlet uurunda ilk erlerimiz artık vardı».