Komratta «Düz-Ava»:sekizinci nota- sevgi» kiyadın prezentaţiyası geçti,adalı «Düz-Ava» Moldova devletin,Gaggauziya türkü hem oyun ansamblisinin yaradıcılık yoluna.Kiyadın avtoru Gagauziya şanlı jurnalisti Anna Harlamenko.Yaratma rus hem gagauz dillerindä yazıldı. Gagauz dilinä onu çeverdi İrina Reşilän. Yortulu oluşta «Düz-Ava» ansamblisinin artistleri, dostları,insannar, kim koruyȇr incä zanaatın paalılıklarını hem GRT kanalın çekim grupası bulundu.
«Düz-Ava»:sekizinci nota- sevgi»kiyadın avtoru,Gagauziya Şanlı jurnalisti Anna Harlamenko ansamblinin kurucularına,öndercilerinä,hem herkezinä kim çalıştı hem çalışȇr bu zamannara kadar kendi saygısını ham hatırını yaratmanın sayfalarına döktü.Kiyada avtor topladı unikal materiallarını,baalı kollektivin istoriyasınınnan onun ilk adımlardan. Anna Harlamenko üzlän intervyu yazdı insannarlan,kimin hatırınnan «Düz-Ava» büünnän büün yaşȇȇr,hem tanıdılȇr kulturamizi diil sade Moldovada,ama aşırı devletlerdä dä.
Anna Harlamenko kiyadın avtoru, Gagauziya Şanlı jurnalisti: «İlk kiyat,benim bakışıma— o Milli Gagauziya halkın kulturasının ,adetlerin, «Düz—ava» ansamblisinin, ana toraamızın özellii. Kollektivi hem Semön Pometkuyu bän çok yıl sıravardı bilärdim. İlya Filev,Dmitriy Peev,Grigoriy Marar,Grigoriy Kurtev».
«Düz-ava» diil sıradan bir ansambl,bu insanın eceli,halkın istoriyası. Bän istedim anmaa o insannarı ,kim canını hem ecelini incä zanaatına verdi. Halezdän önemliydi annadım Semön Pometku için,angısı ansamblinin temelini koydu .
«Nasıl kiyadın adı kuruldu? Semön Vasilyeviç şaka olarak bana deyardi,ani ona 7 nota az. Biz düşündük 8-ci nota-sevgi adlansın. «Düz-ava»–bu büük sevgi. Sevgi halkına,muzikaya,oyunnara,türkülerä,ana erinä,yaşamaya.
8-ci nota öter herkezin canında, kim sever «Düz-ava» ansamblisinin yaratmalarını.Bu yıl onnar 55-ci yıldönümünü nışannȇȇr. Bu sonsuz, çünkü nekadar yaşayacek halk, okadar «Düz-Ava» avaları ötecek».
Butakım kiyatlar –kulturamızın zenginnii.Gençlär lääzım istoriyamızı bilsinnär, söledi kultura bakanı Marina Semönova: « «Düz-Ava»:sekizinci nota- sevgi» kiyadın prezentaţiyası,bu diil çıkış, bu 55 yılın yaradıcılık yolu belli etmesi. Kiyat ihlam gelän evlat boylarımıza olacek, eni yaratmalara, eni buluşlara, sonsuz alkışlara».
Kiyadın taa bir özellii var. Sayfalarda ansamblinin oyunnarın hem türkülerin küar kodları var. Okuyucuların olacek kolaylıkları tanışsınnar gagauzların kulturasınınnan. Kiyadin tiparlanması –büük şükürlük kollektivin hepsi artistlerinä, söledi Maestro in Arta -Tatyana Şögoleva: «Az kim biler Semön Pometkonun anmak gününü. Biz onun Duuma gününü nışannȇȇrız. Onun ömürünü kollektiv yaşadȇr. «DÜZ-AVA» çalışȇr hem ileriya da üüsek uurda çalışacek».
Viktor Gradinar «Düz-Ava» Gagauziya türkü hem oyun ansamblisinin horeorgafı: «Kiyadın yazılmasında bizim annatmalarımız,onnar belli ederlär ansamlinin kurulmasını.Biz lääzım açıklayalım hem dooru yoldan gidelim, angısına çoyu insannar yaşamasını verdilär».
«Düz-Ava»:sekizinci nota- sevgi»kiyadın prezentaţiyasına 1971 yılında olan dolay kultura başı Klavdiya Balaban geldi: «Bu kiyat diil sade ansambinin istoriyası, bu gagauz halkın istoriyası.Şevinerim, ani çalışmalarımız o yıllarda boşuna diildilär,da «Düz-Ava» yaşȇr».
Nikolay Dudoglo GHT deputatı: «Kutlȇȇrım avtoru,gözäl bir kiyat olmuş. İlk adım oldu,ikinci kiyad çıksın bän da yardım edecäm».
Prezentaţiyada kutlamaklar , şükürlär hem elbetki muzika öttü.