Ne lääzım bilsin seçici? Nicä geçerlär seçimnär hem neçin önemli herbirin sesi? Bu soruşlara hem başka Komradın yaşaynnarı kablettilär cuvap “Dooru seçimnerin kasabacıı” informaţiya akţiyasının vakıdında. Onun pay alannarı tanıştılar seçim proţessin adımnarınnan interaktiv formatta.Taa derindän N.Andrieş.
“Seçimnär çekederlär haberlenmiş ayırmaktan” kampaniyası doorudulu cümnenin bilgilerini seçim proţessları hem hakları hem demokratik proţesslerindä herbirin pay alamasının önemlisi için.Bu neeti koydular önündä akţiyanın pay alannarı ,angısı Komratta geçti. Bunun için haberledi ADEPT kurumun başı hem kurucusu İgor Boţan.
İGOR BOŢAN ADEPT başı hem akţiyanın kurucusu
“Bu tanışmak akţiyası gençlär için hem onun için,ki onnar alışsınnar, açan olaceklar 18 yaşında, onnarda ses vermäk hakı olacek,da bilsinnär temel proţeduraları. Da biz geçireriz bu akţiyayı barabar UDNP, Birleşik Milletlerin Organizaţiyasınnan,angısı bu işi tutturȇr. Gençlerä teklif edecez türlü konkursları onun için, ki peydalansınnar becermeklär, nicä dooru ses vermää, alarak esaba kanonu, normaları, nasıl dikkat olmaa ona,ne kanondan uzak”.
Tematika meydannarında kasaba yaşayannarı annayabildilär taa çok kendi ayırıcı hakları için, tanıştılar ses vermäk proţedurasınnan hem kablettilär cuvapları kendi soruşlarına.
«Bän sayȇrım, ani bu pek önemni neçinki bizim gençlerin taa çoyu bilmeerlär nicä geçer seçimnerin proţesi. Bunun için bölä oyun üüreder bizim gençleri nicä kendini götürmää hem nicä bu proţes geçer.»
«Bölä akţiyalar lääızmnı da en pek bitki yıllar, açan çok şamata var elektoral korupţiya dolayında. Bän sayȇrım, ani bölä akţiyalar önemni diil sade gençlär için, ama hepsi yaşayannar hem ayırcılar için kimdä var ses vermäk hakı. Biz bileriz, ani herbir ses önemni. Da bölä olayları lääzım okullarda da geçirmää demokratiya haklarını ses vemäk hakları için annatmaa. Bunun için bölä olayları çok geçirmää lääzım neçinki herbir ses pek paalı.»
İnteraktiv format verdi pay alıcılara kolaylık diil sade işitmää haberleri, ama kendileri da geçsinnär ayırcının yolunu proţeduraylan tanışmaktan maanası ses vermäk proţesinädän. Kurucuların laflarına görä haberlemäk yardım eder vatandaşlara taa islää kendini duymaa seçim proţesindä hem düşünmekli seçmää.
POLİNA PANAİNTE akţiya kurucusu
« Biz pek sevineriz, ani bölä çok gençlär meraklanȇrlar onunnan neylan biz geldik, seçimnärlän, serbest hem dooru seçimnärlän, angıları avtonomiyada geçeceklär. Çoyu soruş koyȇr da biz cuvap ederiz, bakȇrız nicä onnar ses vererlär, açan ayırȇrlar, nesoy kalitelär lääzım islää deputatta olsunnar, söleerlär dooruluk pahalılıkları için hem integraţiya için.»
Akţiyanın pay alıcıları nışannȇȇrlar, ani bölä format verer kolaylık taa islää kabletmää lääzmnı haberleri hem annamaa nicä kurulu seçim proţesi.
“Üürendim onun için,nicä dooru lääzım gelmää, hem nesoy seçmää, nicä bunu yapmaa”.
“Bu faydalı, neçinki tanıştırȇrlar informaţiyaylan, kolay hem meraklı”.
Kimi pay alannar için da bu akţiya kendi bilgilerini kontrol etmäk oldu, kimä sä da sefta derindän tanışmaa kendi seçici haklarınnan.
“Bizim borcumuz büün yardım etmäää insana termini ne o ses annamaa, ne o ayırmak,da geçmää birkaç etap, kabletmää deyni bölä dokument. Da sora ayırılacek baaşışların birisi”.
“Sanȇrım,ani bu önemli,neçinki tezlää kendim 18 yaşında olacam, istäärdim bilmää nasıl hepsi dooru lääzım geçsin”.
“Bu olaylar çok önemli gençlär için, tanışsınnar deyni,ani herbir ses önemli onnarın gelecää için. Bän olacam tezdä 18, da ayıracam kendi yolumu hem kendi geleceemi”.
Kurucular nışannȇȇrlar,ani pay almak seçimnerdä – bu herbir vatandaşın kolaylıı göstermää kendi poziţiyasını da pay alsın gelecään kurmasında.Bölä informaţiya kampaniyaları neetli yapmaa seçim proţessini taa açık hem annaşılı. “Dooru seçimnerin kasabacıı” oldu bir meydan, neredä oldu kolaylık kabletmää bilgileri, lafetmää hem praktikada tanışmaa seçim proţessinnän. Düşünmekli ayırmak çekiler haberlemektän, herbir vatandaşın sesi da – kolaylık işidili olmaa.