GHT deputatları 43-cü oturuşunu geçirdilär. Onun süresindä bakıldılar soruşlar, angıları Gagauziyanın cümnä-ekonomika ilerlemesininnän baaalıydılar. İş süresindä bakıldı soruş, angısı erli yolların düzülmesi finanslanmasıınnan baalıydılar. Önemni soruşların arasında bulundu GHT seçimnerinnän baalı soruş ta. Deputat V. Kısaa oturuşun süresindä teklif etti MSK azalarını teklif etmäk hem kabletmäk soruşunu bakmaktan çıkarmaa. Bununnan bilä ama bakıldı soruş, angısında laf gitti HT deputatları, MD parlament deputatları hem MSK arasında iş grupanın kurulmasınınnan, angısında bakılaceklar  HT seçimnerinin hazırlanması hem geçirilmesi  incelikleri.

GHT başın işini götürän Nikolay Ormanji nışannadı, ani teklif ediler Komrat hem Kişinöv aralarında  var olan soruşların bakılması için iş grupanın izmetini ofiţial uurda enidän başlatmaa.  Lääzım olarsaydı bu grupanın azaları enidän bakılsınnar yakışacek.

«Biz büün teklif ederiz eniletmää bu iş grupasını. Eer deputatlar korpusu diilselär kayıl bu kandidatlarlan, var nicä başka kollegaları teklif edäsiniz bu komissiyaya da biz enidän komissiya azalarını  kabledecez»,- Nikolay Ormanji nışannadı.

 GHT deputatı Sergey Zahariya açıkladı, ani neetlener bu grupadan çıkmaa hem kendi erini başka kollegasına vermää.  Soruşun bakılması süresindä bölä kararları açıkladılar başka deputatlar da. 

«Bän grupaya girärdim, ama onun işini durgutması için bän sesimi vermedim. Ama var ölä kolegalarımız, angıları grupanın işinnän memnun diil , onuştan bän kendi kandidaturamı geeri çekerim, hem vererim başkalarına kolaylık taa çok yapmaa»,- Sergey Zahariya açıkladı.

Deputat Vladimir Kıssa nışannadı, ani eer grupanın taa çoyu azaları işlemää istemäzselär lääzım olacek eni kandidaturaları belli etmää , angıları merkez kuvetlerinnän iş baalantısını kuraceklar hem Gagauziya seçimneri soruşunu da açıklayaceklar.

«Teklif ederim belli etmää insannarı, iş grupasını, ne baalı MSK-n, açıklayalım bu soruşu. Çünkü görerim, ani hepsi kendini geeri çekerlär, ama en ilkin lääzım belli etmää deputatları, angıları büünkü günün soruşlarını gelän aftaya gideceklär açıklamaa. Hederlez ayın sonunadan biz lääzım seçimnär gününü belli edelim»,- Vladimir Kıssa nışannadı.

GHT başın yardımcısı Georgiy Leyçu açıkladı, ani iş grupanın enidän işlemää başlaması politika uurunda işä girişmeyä hazırlıını gösterecek.

«En aazdan politika maanası olsun lääzım. Onuştan teklif ederim bu kararı kabledelim , ötää dooru sa kim isteer, iş grupasına onu koymaa»,- Georgiy Leyçu açıkladı.

Bitki-bitkiya deputatlar iş grupasını enidän başlatmaa deyni seslerini verdilär. Onun kurmaa hem azaları belli etmää soruşu taa bakılacek, nışannadılar deputatlar.