Kırbaalı küüyündä büük sıcaklıklan dedelerdän kalma adetleri koruyȇrlar. Birkaç yıl geeri, küüyün aktiv yaşayannarın iniţiativasına görä, burada folklor kolektivi kuruldu. Kolektiv toplayabildi o insannarı, angıları dedelerin türkülerini hem oyunnarının severlär hem evladlara onnnarı vermää isteerlär.
Kırbaalı küüyündä dedelerdän kalma evelki türkülär hem oyunnar büük dikkatlıklan korunȇrlar hem evladtan-evlada verilerlär. 2021-ci yılda küüyün yaşayannarı çıktılar iniţiativaylan folklor kolektivini kurup, bu işi gerçeklemää. Kolektivin adı büün taa yok, ama bu engel etmeer onun pay alannarına aftada birkaç sıra toplanıp, sevgili işinnän zanaatlanmaa, nışannȇȇr Kırbaalı küüyü kultura evi başı Evdokiya Dermenji: «İsteerim sölemää, ani biz avşamneen repetiţiyalara geleriz, gündüz hepsi işleer. İsteerim şükür etmää hepsi ayleleri, ani anȇȇrlar hem bu işlän zanaatlanmaa izin vererlär».
Kolektivin repertuarında büün 15 oyundan zeedä şansora var. Onnar Kırbaalıyı Regionun herbir kultura olayında üüsek uurda temsil ederlär. Onnarın sţenaya herbir çıkışı diil sade oyun, ama dedelerimizin istoriyası, angısı muzikanın, giiyimnerin hem milli özelliin yardımınnan annadılȇr, nışannȇȇr kolektivin azası Konstantin Gaydarjı: «Bu evelki bir oyun, angısını bän babumdan gördüm. O beni üüretti oynamaa bu oyunu».
Kolektivin payalannarı nışannȇȇrlar, ani onnarın en büük daavaların biri bu zenginnii korumaa hem evladlara vermää.
«Teklif ederiz gençleri pay almaa bizim işimizdä. Ko onnar üürensinnär hem korusunnar onnarı»,- nışannȇȇr kolektivin azası Konstantin Gaydarjı.
Diil çoktan kolektivin pay alannarında taa bir sevinmelik peydalandı, “Jemçujinı Yuga” MİGın yardımınnan , onnara giimnär dikildilär hem lääzımnı muzika tedarlıkları satın alındılar, nışannadı küüyün primarı Tatyana Kiosä: «Bän Valkaneş dolayı kultura bölümünä danıştım , Dmitriy Nedov bizä yardımcı oldu. Pek sevineriz, ani büün var kolayımız çıkmaa türlü olaylara da üüsek uurda Kırbaalıyı temsil etmää».
Primar nışannadı, ani giimnerin kıvraklıı hem unikallıı kolektivin herbir çıkşını sţenaya taa renkli hem meraklı yapȇr. Kırbaalıda Halk incäzanaatını korutmak, o saygı geçmişä hem umut gelecää. Artistlär sayȇrlar, ani nekadar öteceklär halk türküleri hem yaşayacek adetlär- okadar yaşayacek küüyün canı da.