Üüsek daava palatası bitirdi çok yıllık daartışmakları Komrat primariyanın hem Gagauzkoop aralarında merkez panayırın kullanmasında. Kabledilmiş karar için belli oldu muniţipal sovetin oturuşunda fevralin 27-dä. Butakım daava instanţiyası başardı annaşmakları, angıları birkaç yıl sıravardır kalardılar erindeki kuvetlerin hem cümnenin göz altında.
Daava dartışmaklar primariyanın hem Gagauzkoop işletmenin aralarında çekettilär 2017-ci yılda ondan sora, nicä muniţipiy istämedi uzaltmaa işletmeya arenda için annaşmayı panayır kullanmasında, haberledi primar Sergey Anastasov: «Büün bizdä var üüsek daava palatasının taa bir kararı, neredä onnar koyȇrlar bizi vermää izinneri Gagauzkoop işlesin o primariya erlerindä. Bakmayarak ona, ani biz istämedik bunu yapmaa da verdik dokumenti bunun için. Annaşmanın vakıdı, angısı 2010-cu yılda kuruldu üç yılına bitti 2013-cü yılda».
Nasaatçı İvan Panä urguladı, ani primariya şindiya kadar temsil etmedi mehanizmayı, nicä bu durumdan çıkmaa.
«Alarak esaba onu, ani biz bişey yapamȇȇrız. Kanon brakmȇȇr. Aktual annaşmalar yok. Da bu üserä panayır şindi asılı durȇr. Da bölä çok duracek»,- İvan Panä urguladı.
Daava kararını yapmaa lääzım. Nicä haberledi primar yardımcısı İrina Zelenskaya primariya neetlener derindän üürenmää daava kararın motivaţiya payını.
« Bu daava oturuşların hem proţeslerin sade bir küçük payı, angıları giderlär bizdä da baalı muniţipal panayırlan»,- primarın yardımcısı İrina Zelenskaya haberledi.
Muniţipal naastçıları verdilär izin primariyaya gelän oturuş için hazırlasın bütündän raportu daava dartışmakları için ne baalı panayırlan hem temsil etsinnär harçların sayısını, angıları üridik izmetlerinä verildilär proţesleri geçirärkänä. İvan Panä nışannadı, ani durum doorudan diiyer üzlän panayırcıyı.
«Bu ilk haber, angısı gösterer, ne panayırlan olȇr. Annadacam neçin bu soruş kalktı. Üç aftanın süresindä bän her gün panayırdaydım. Da bu soruşlan her gün kimsä yaklaşardı da sorardı ne olȇr»,- İvan Panä nışannadı.
Üüsek daava palatası braktı kuvettä Komrat daavasının kararını, angısına görä Gagauzkoop işletmeya lääzım verilsinnär hepsi dokumentlär onun çalışması için Komrat panayırlarda, angıalrı Pobeda hem Ferapontyevskaya sokaklarında erleşili. Ama primariya daava kararını yapmȇȇr, söledi Gagauzkoop başın yardımcısı Tatyana Kolodeeva: «2025-ci yılın dekabrinin 17-dä üüsek daava palatası kabletti eni kararı, angısında braktı ştraf sankţiyaları hem taa bir keret belli etti, ani o lääızmnı yapılmak için. Büünkü gün primariya lääzım versin hepsi dokumentleri, angıları lääzımnı, ki belli edilän panayırların teritoriyasında işlemää»
Komrat kasabasının primarı haberledi, ani soruşlar, angıları baalı panayır çalışmasınnan hem kullanmasınnan bakılaceklar muniţipal sovetin oturuşunda.