Çok-Maydan küüyündä serbest güreşindä turnir geçirildi. Sport oluşu avtonomiyanın  sportçularını topladı, ona 90 uşaadan katıldı.

Serbest güreşindä turnir türlü çeki kategoriyalarında geçti. Sportçular dayanıklıını, kuvedini kendi çeki kategoriyalarında, tehnikaları hem istediini taramaa  gösterdilär, söleer Çok-Maydan küüyündän trener Vasiliy Arnaut. Terbiedennerin güreşmesini trenerleri gözledärdilär. Onnara, nicä dä sportçulara deyni  yarışmalar avtonomiyada serbest güreşmesini ilerlederlär. Bölä yarışlarda sportsmennär sorumnu becerikleri alȇrlar hem eni başarlara zaametlerinnän örüyerlär, paylaşȇr trener Mihail Molla Beşgioz küüyündän.

 «Oluşa Gagauziyanın may hepsi küülerindän  toplandılar. Bän kendi komandamnan seftä pay alȇrım. Geçän yıl taa az pay alan vardı, bu yıl geografiya genişlendi».

“Küçüklär dä islää güreşerlär. 62-82 çeki kategoriyasında uşaklar biri-birni tanıyȇrlar”. 

Pay alanların arasında vardı te o sportçular da, kim seftä güreşmäk meydanına çıkmȇȇr.

“Bana deyni önemli bu gün. Kaavi sportçularlan güreştim”.

“İlk güreşim ii uurda geçti, ikincisi pek ii olmadı”.

“Bana kaavi güreşçi Dezgincedän düştü. Üüsekti bendän hem belli, ani taa bilgili.”

“Benimnän güreşän sportçu ii hazırlanmış, becerikli çıktı”. 

“Bölä yarışlarda üürenersin hem para da var näcä kazanmaa”.

Turnirin kurucuları belli ederlär, ani ikinci yıl sıravardı geçirmäk gösterer, ani serbest güreşmesinä merak yıl-yıldan büüyer. Turnirdä Gagauziyanın 11 yaşamak erindän 90 sportçu katıldı. Yarışmaları tutturdu hem yardım etti geçirmää erindeki kuvetlär hem cümnä çalışannarı. Küüyün primarı Oleg Konstandoglo gençlerä deyni oluşların önemliini belli etti.

“Umut ederiz, ani bu uşaklar büük sportsmennär olaceklar. Hepsi uşakları tutturȇrız. Şükür ederiz hepsini, kim turnirin geçirilmesindä bizi tutturdu“.

Spordun önemlii- onun ilerlemesindä, söleer Komrat dolay administraţiya başı Vadim Çeban. 

“Bu turnirin geçirilmesini biz plannadık, o her yıl geçirilecek. Hepsi sportçulara travmasız güreşsinnär dileeriz. Çocuklarımız taa ii hazırlansınnar da başarlı güreşsinnär”.

Turnirin sönunda tarayıcılar kendi çeki uurlarında diplomnarı, medalileri hem para baaşışlarını kablettilär.