240 uşak Moldovanın yaşamak erlerindän hem başka-başka devletlerindän dinnendilär Kirsovo küüyün «Çayka» lagerindä.  Smenanın bitki günü yortulu geçti. Uşaklar meraklı programayı hazırladılar. 

«Çayka» dinnenmäk bazasında ikinci lager smenası bitti. Yortulu kapanışı uşaklar kendi üüredicisinnän hazırladılar. Lagerin başı Viktoriya Fedotova uşaklara şükürlemäk sözünnän danıştı. 

«Sizi  hepsi ileridä bekleer. Herbir kısmetli kıpım için bütün komandanın adından şükür ederim. Siz bizimnendiniz, siz super!»,- nışannadı lagerin başı.

Smenanın bikti günü uşaklara deyni kendibaşına günü oldu. Onnar kendileri vojatıy oldular, büüklär dä uşakların erinä geçtilär. Diskoteka bitki avşam  taa uzun sürttü. 

«Smenalar ikisi dä şaştırdılar- bizim okadar talantlı uşaklarımız, onnar oynȇȇrlar, türkü çalȇrlar, peet yazȇrlar. Geçirildii günnär pozitivliydilär. Sansın dün smena çekettiydi,osa bitti. İstämeerim uşaklarlan ayırılmaa»,- söledi lagerin başı Viktoriya.

Herkezi nesä aklısında bu zamandan  aldı. Kimsä üzmää üürendi, kimsä dostlaştı, kimsä sţenaya seftä çıktı.

«Bu 10 gün unudulmaz duyduları üreemdä braktılar. Dostlarım şen, talantlı, terbiedicimiz ii ürekli hem annayan,direktorumuza çok saa olsun bölä gözäl zamanı geçirmäk için. Sevinerim, ani buraya düştüm».

«Hepsi isläydi, evä istämeerim gitmää. Hepsindän pek vojatıyları, diskotekalara  katılmayı  beendim». 

«Bän lizginkayı oynadım, halk oyunnarını beenerim, futbola oynadık, taradık, ama önemli diil, pay alamak taa ii».

Uşaklarda şıralı anmaklar, ana-bobalarda —  inan, ani uşaklara deyni zaman faydalı geçti. 

«Oolumnan hodullanȇrım, o iicä dinnendi. Uşak beendi, bundan da kısmetli. O kısmetliysä, bän da kısmetliyim», — nışannadı uşaan anası. 

Lagerin başarlıı  sade durumdan çekilmeer – bu büük hazırlık işi.  Diil  bitki aylar burada çok işlär diişildilär, söledi Kirsovo küüyün primar  yardımcısı Dmitriy Varban: «Lagerin dolayanında 100 metra brusçatka koyuldu, ikinci katta remont oldu, duş, imek bloklarında remont işileri yapıldılar. Büünkü günä lagerin işi 5-tän beşä notalanȇr». 

Viktoriya Fedotova «Çayka» dinnenmäk bazası direktoru : «Çayka» lagerin çalışannarını bereketli çalışmak için şükür ederim. Ana – bobalar da saa olsunnar, ani uşaklarını bizä inandırdılar. Sizin uşaklarınız käämil!».

240 uşak devletin türlü dolaylarından hem aşırı devletlerdän bu yaz bir büük lager aylesi oldular. 240 uşak istoriyası, 240 uşak gülüşü hem okadar da saalıcaklaşmak sarılması.