Çadır — Lunga kasabasının demir yolun probleması bakılȇr bir yılın süresindä. İyündä primariya haberledi demiryolu işin durgunması için. Ama sentäbr ayın çeketmesindä erli kuvetlär genä haberledilär problemanın çözülmesinin lääzımnı için, may alez eni üürenmäk yılın çeketmesinnän. Temayı ilerleder Polina Barbova.
Diil çoktan burada hepsi geçärdi nicä lääzımdı olsun — yaklaşȇr tren — indiriler şlagbaum, gezinti durgunȇr. Tren geçti — şlagbaum kaldırılȇr, da kasaba enidän yaşȇȇr. Zamandaşta sa hepsi başkatürlü. Lenina hem Proezdnoy sokakların çatırında «Moldovanın demir yolu» kurumun optimizaţiyasından sora, avtomat gezintisi işlämeer lääzımnı rejimda. Şlagbaumun erinä — «СТОП» yol nışanı.
Şlagbaum vardı, kapanardı. Şindi sa? Şindi sa primar savaşȇr. Bakınız nesoy probkalar — bu yok nicä olsun.
Nicä haberledi Çadır — Lunga primar yardımcısı MİHAİL STOMATOV, «Moldovanın demir yolu» kurumun optimaziţiyasından sora, avtomat gezintisini geçirdilär diil işleyän razrädına.
MİHAİL STАMOV Çadır — Lunga primar yardımcısı
Ondan sora, nicä çıkardılar şlagbaumu, koydular „СТОП“ nışannarı. Bu demir yolu toplȇȇr bireri kasabanın iki payını, da pik saatlarda o üzerä, ani yok avtomatizaţiya, olȇrlar kilometradan zeedä probkalar. Kasabanın avtobusların grafii diişer, pek büük problemalar olȇrlar hızlı medik yardımı işindä, yangın bölümü için. İnsannar sabaylen durȇrlar sıralarda, probkalarda yarmışar saat. Problema pek büük.
Şoförlar lääzım beklesinnär. Avtobusların pasajirları da. Ama hızlı bölümneri için bu olmaz.
«Var bölä problema, da onu çözmää lääzım».
«Maşınalar var nasıl dursunar — bu var mı nasıl olsun?»
«Burada her zaman toplanȇrlar maşınalar. Şoförlar için — bu nerva, insannar için da hep nerva. Korkunçluksuz için lääzım şlagbaum».
Taa ileri Çadır — Lunga kasabasının primariyası danıştı İnfrastruktura Ministerliinä hem da «Moldovanın demir yolun» çorbacılıına. Primaria kabletti ofiţial cevabı, ani kompaniya hazır üüretsin 4 kişiyi geçmäk için yolu.
«MOLDOVA DEMİR YOLU» DEVLET KURUMU
Sizin kararınız kendi başınıza görä hazırlamak için kandidatları sayılȇr özel gibi, dorutmak için durumu. Kendi tarafından «MOLDOVA DEMİR YOLU» Devlet Kurumu hazır parasız kursun hem da üüretsin, tehnika instruktajı, bilgilerin bakmasını hem da kandidatlarım atestaţiyasını, angıları dorudulu primariyaylan”.
Erli kuvetlär haberleerlär, ani hazır alsınnar üstünä finans tarafını, ödemää deyni insannarın işini, angıları çalışaceklar demir yolunda.
MİHAİL STАMOV Çadır — Lunga primar yardımcısı
Dünkü gündän biz haberledik insannarın gelmeleri için. Gelerlär insannar, haberleerlär kendileri için. Yapacez analiz, teklif edecez demir yolun temsilcilerini. Onnar lääzım olaceklar üüretsinnär bu insannarı, kim işleyabilecek. Bu cevaplı. Da ondan sora, nicä onnarı kabledeleceklär işä, geeri verilecek şlagbaum, da olacek nicä taa ileri.
Karar sasade hazırlanȇr, şoförlara sa kalȇr bakmaa «СТОП» nışanınnarı hem da beklemää kendi sıralarını. Çadır — Lunga kasabasının sa yaşayannarı umutlanȇrlar, ani şlagbaum tezlä vakıtlarda dönecek kendi erinä.