Pötr Buyukli 77 yaşını nışannȇȇr. Trener, angısı çok çempion büüttü. Çalışmaa o Komratta çeketti, yaşamanın taa büük payını Kişinövda ilerletti. Profesionallık yolu hem sevgi için sport zanaatına – sıradakı haberimizdä.
Pötr Buyukli – adam, angısının yaşaması dübä-düz sportlan baalı, gençleri terbietmäklän hem Mdserbest güreşmenin ilerlemesinnän. Mardın 22-dä kendi 77-ci yaşını Pötr Nikolaeviç nışannȇȇr. İlk sınışları serbest güreşmesindä o duuma küüyündä Odesa bölgesinin Kubeydä küüyündä geçirmiş. Sport tehnikumunu Kişinövda başardıktan sora, Komrada yollandırılmış, getirder aklısına Pötr Buyukli: «Sabaalendän üülenädän – okulda, üülendän sora – sport okulunda. Orada Komrattan uşakları çekettim toplamaa, serbest güreşmesini sevennär çok var. gagauzlar talantlı hem islää çocuklar».
Bir zamandan sora, onun çalışmak yolu Kişinövda ilerledi, neredä dä trenerlik temel çalışması geçti. Sport yıllarında Pötr Buyukli büük başarları kazandı. Onun zanaatı – ömür işi oldu.
Pötr Buyukli MD şannı treneri:«Respublika gençlerin hem körpä sportsmennerin en büük treneri bändim. Zanaatı beendim, çünkü uşaklarlan çalışmayı beenerim. Ozamandan da benim sevgili işim oldu».
Yıllar boyunca Pötr Buyukli devletä sportçuları büüttü – onnarın arasında Evropa hem Dünnä çempionnarı var. Ama en büük başarı – insannar, angıları trenerlik işini ilerlederlär. Onnarın da birisi – trener İgor Kikioy: «Pötr Nikolaeviçlän liţeydän birerdä çekettik işlemää. Şindi biz onnan kolegalar. Sportçuluk işini ondan savaşȇrım üürenmää, o trener olarak, insan gibi iidir».
Üürenicilär üüredicinin profesionallıını, doorulukçu trenerlik kalitelerini belli ederlär. Denislav Petev paylaşȇr: «Olȇr momentlär, açan bizä lääzım biraz sesini kaldırmaa, çünkü disţiplina ikinci erä kalȇr. Te o vakıtta o bizi doorudȇr».
Pötr Buyukli sport yaşamasını ilerleder, brakılmaa düşünmeer. Evdä dä şakalı dartışmakların eri var.
Pötr Buyukli MD şannı treneri: « Sport toplamnarı,yarışmaklar hepbir var. Eşim sorȇr: «Nekadar var nicä?» Bän deerim: «Nicä durgunıım?»
Pötr Nikolaeviç Buyukli Kişinövun sport okulunda genöleri çalıştırȇr. O – kendi zanaatını sevän hem evlad boylarını saalıklı sport ömüründä götürän adam, angısı inandırȇr, zanaatına haliz sevgi sınırları bilmeer.