Harman ayında Gagauziya Bakannık komiteti kararladı Bucak hem Ferapontyevka küülerdä küçük üüretim kurumnarın reorganizaţiyasını geçirmää. Bucak küüyün gimnaziyasını başlankı şkolaya geçirmää , Ferapontyevka küüyün gimnaziya – yaslasını sade yasla yapmaa.
Kararlar üüretim kurumnarın reorganizaţiya için Bucak hem Ferapontyevka küülerdä baalı üürenicilerin azalmasınnan baalı, açıkladı Üüretim bakanı Nataliya Kristeva.
NATALİYA KRİSTEVA Üüretim bakanı
«Bu proekt baalı Bucak başlankı publik kurumun adının diişmesinnän. Getirderim sizim aklınıza, ani taa çiçek ayında Gagauziya Bakannık komiteti kararladı Bucak küüyündä üüretim publik kurumunda başlankı şkolaya reorganizaţiyayı geçirmää. Bu dokumentlär lääzımnı , ki bu işi başarmaa kanona görä».
Diişmeklär baalı üüretim Kodeksin kurallarınnan.Kanona görä, her üüretim kurumunda 35 üürenicidän taa az üürenärsä , ozaman onu başlankı şkolaya geçirmää lääzım, her 10 uşaktan aşaa sa , ozaman yaslaya. Bütün devlettä bu kriteriyaların altına 73 şloka girer . Gagauziyada onnar 2 – Bucakta 61 üürenici hem Ferapontyevkada 20. Reformaya görä ,üüretim sistemasında harçlar taa ii bakılaceklar hem uşakları yannaşık şkolalara transpotta getirileceklär.
NATALİYA KRİSTEVA Üüretim bakanı
«Bu proekttä bakılȇr reorganizaţiya işi Ferapontyevka küüyündä Marko Vovçok adına gimnaziya hem yasla kurumun hem onun funkţiyalarını erli sovetä geçirmää. Proektin baş neeti – üridik uurunda reorganizaţiya işini kararlamaa , kurumun funkţiyalarını geçirmää hem kolvermemää yaslanın işi durgunsun».
İlerki adım, angısı reorganizaţiyaya girer – o kurumnarın vaarlıını küülerin erli sovetinä geçirmää. Bunun için Üüretim bakannıı hepsi lääzımnı diişilmekleri informaţiya sistemasına geliştirer.
NATALİYA KRİSTEVA Üüretim bakanı
«Lääzım kabletmää komisiyanın azalarını , ki üüretim kurumnarın vaarlıını geçirmää. O komisiya lääzım bütündän invetnarizaţiyayı yapsın. Bundan kaarä , ayırı işlär Üüretim bakannıına da koyulȇrlar, ani informaţiya sistemasında diişmekleri koşmaa».
Gagauziya Üüretim bakannıın azaları nışanȇȇrlar , ki bu kıpımda en önemni kurumnarın finans hem çalışmak işlerini durgutmamaa .
NATALİYA KRİSTEVA Üüretim bakanı
«Bu proekt hepsi soruşlara cuvap verer,angıları reorganizaţiyanın süresindä var nasıl olsunnar. En önemni neet sentäbrinin birindän kurumnarın işlerini başlamaa».
Gagauziya Bakannık komiteti bir seslän reorganizaţiyayı tutturdu. Dokumentlerin eniletmesini üürenmäk yılın çeketmesinädän başlasınnar lääzım. Uzmannar çizgeleerlär , ki üürenicilerin azalması baalı demografiya proţeslerinnän , insannarın devlettän gitmesinnän hem uşakları başka üüretim kurumnara geçirilmesinnän.