Kongaz küüyü moldo-türk liţeyindä «Bir gündä dünneyi dolaş» yardım sergisi geçti.  Bu fikir üürenicilärlän  liţey üüredicilerin destäännän geçirildi.

Herbir klasın üürenicileri türlü devletlerin kulturasını hem imeklerini hazırlamıştı: Türkeyä, Kanada, Gagauziya, İtaliya, Almaniya, Amerika hem Britaniya. Bu olay dünnä gezisi gibi yapıldı. Liţeyin üürenicileri nasaatın öndercisi Tatyana Kandratova üürenicilerin olaya katılması havezini çizgiledi.

 Tatyana Kandratova liţeyin üürenicileri nasaatın öndercisi: «Bu serginin geçirilmesi için biz cuvapçıydık. Benim bakışıma görä bu yıl o pek şıralı, gözäl. Baş tememız-«Bir gündä dünneyi dolaş». Başka yıllar biz onu güzün gelmesinä adaardık, bu sıra sa onun büüklüü şaştırȇr. Hepsi finanslar, angıları toplanılaceklar, yardım uuruna gideceklär. Burada biz kendi acızgannıımızı göstereriz. Toplanılmış paralarlan biz Kongaz küüyü zor durumda bulunan  yaşlı insannarına yardım edecez».

Serginin musaafirleri daadabildilär Britaniya tatlılıklarını, Gagauziya kaurmasını, türkiye tatlılıklarını, İtaliya piţasını hem başka imekleri.

«Biz büün türkiye imeklerini hazırladık. Sevinecez, eer bizi metedärseydilär».

«Kaurma, kıırma, şıra-biz kendimiz hazırladık. Analar yardım etmedilär, çünkü biz şansora büüküz».

«Bizdä taa çok tatlılık. Angliyada bir da sabaa ekmää çaysız geçmeer. Bizdä var sütlü çay,lalangı, rulet, mafinnär, hıyarlı buterbrod, akıtma».

Liţey öndercilii nışannadı, ani bölä yortular diil sade uyandırsınnar uşakların meraklıını dünnää kulturalarına, ama acızgan olmaa da üürederlär.

Bu sergi   diil sade imek kulturası tarafında gözäl bir yortu oldu, ama önemni işleri yapmak adımı da.

«Biz sevinmeliklän bölä olaylarda pay alȇrız, çünkü annȇȇrız, ani toplanılmış paralarlar zor durumda bulunan insannara yardım ederiz».

«Yaşlı insannarın çoyuna büün yardım lääzım, çünkü çoyu büün onnarı yalnız brakıp, aşırıya giderlär».

«Bän yaşlılara yardım tarafından pay tutȇrım».

Sergidä toplanılmış finanslar Kongaz küüyü yaşlı insanlarına destek vermesinä doorudulaceklar.