Avtonomiyada Region uuru olimpiadalar geçerlär. Matematika, informatika, biologiya, rumın dili, rus dili hem literaturası, yabancı dillär predmetlerindä olimpiadalar artık geçtilär. İleridä kalan predmetlerdä yarışmalar. Bu yarışlarda başlankı klasların üürenicileri dä artık pay aldılar. Katılannarın bütün sayısı artık bir bini aykırladı. Onnar april ayınadan sürteceklär.
Devlet uurunda okul olimpiadaları 9-12 klaslar arasında geçirilerlär. Ama Gagauziyanın olimpiada akıntısının kendi özellii var. Burada Üüretim bakannıın kararına görä intelektual yarışlarına üürenicilär 3-cü klaslardan katılmaa başlȇȇrlar. 3-4 klasların üürenicileri için bu yarışmalar artık 5 yıl sıradan geçirilerlär. Katılannarın sayısı yıl-yıldan zeedelener. Bu yıl 342 uşak pay aldı. 7-9 klasların üürenicileri her yıl matematka predmetindä olimpiadaya katılȇrlar. 5–6 klasların üürenicileri bu yıl rus dili hem literaturası olimpiadasında pay aldılar. Özel bakış gagauz dilinä doorudulu. İleri bu predmettä olimpiadaya 9-12 klasların üürenicileri katılardılar. Ama 2022–2023 üürenmäk yılından beeri bu olimpiadada 5 klastan 8 klasadan üürenicilär pay alȇrlar. Bu yarışmaların önemi için Gagauz Eri Üüretim bakannıın başı N.Kristeva annattı: «Oli̇mpi̇ada akıntısı üüreti̇m si̇stemamızın kali̇tesi̇ni̇ gösterer. Hep ölä onu ilerleder, çünkü üürenicilerin aralarında konkurenţiya olȇr, onnar neetleri koyȇrlar nem bu neetlerini başa çıkarmak için bütün kuvetlän işleerlär».
Üürenicilär olimpiadalarda pay almak için çok hazırlanȇrlar. Eski temaları tekrarlȇȇrlar, bilgilerini genişlederlär. Onnar pek ii bilerlär, ani ilk eri alacȇklar onnar, kimin bilgi uuru üüsek. Olimpiada informatika predmetindä zordu. Bunun için kendileri katılannar söledilär. Sınışları yapmak için 4 saat onnara verildi.
«Sınışlar pek zor. Ama busoy olaylara katılmaa lääzım. Butakım, biz — üürenicilär, ilerleeriz».
«Bu predmettä olimpiadaya seftä katılȇrım. Tek başıma hazırlandı. Ama sınışlar gerçektän zor. Gelecektä kiber koruntusunnan zanaatlanmaa var neetim».
Region uurunda olimpiadalarında tarфyannara Gagauz Eri Üüretim bakannıın adından diplomnar hem premiyalar verileceklär.
I er— 800 ley,
II er — 500 ley,
III er — 300 ley.
Para ödüllerini birinci eri alan üürenicilerin üüredicileri dä kabledeceklär. 9-cu klasta 12-ci klasadan üürenicilär, ani region uurunda 1, 2, 3 erleri alacȇklar Respublika uurunda geçirilän olimpiadalarda avtonomiyayı temsil edeceklär. Orada taa büük konkurenţiya, ödüllär dä taa büük. Geçennerdä Gagauz Erin Bakannık komiteti respublika uurunda olimpiadaların prizörları için premiyaları zeedeletti. Butakım bu üürenicilär hem devlet bücetindän hem dä avtonomiya bücetindän birtürlü prremiyaları kabledeceklär.
I er — 2000 ley,
II er — 1600 ley,
III er — 1200 ley,
ıv er — 800 ley.
Üüredicilär, kimin üürenicileri respublika uurunda ilk eri alacȇklar, 2 bin ley premiya kabledeceklär. Bu premiyalar islää stimul bizim için söledi region olimpiadasının pay alanı Oleg Tanasoglo.
Oleg Tanasoglo, M.Tanasoglo adına gimnaziyası üürenicisi: «Sayȇrım, ani butakım üürenicilerin taa büük havezi olȇr olimpiadalarda pay almak için».
Var taa bir stimul. 9-cu hem 12-ci klasların üürenicileri, angıları ekzamen predmetlerindä olimpiadada ilk erleri alacȇklar bu ekzamenneri vermeyeceklär. Onnara 10 notaları koyulacȇklar.