İkinci yıl sıradan Kırlannar küyündä enidän geçirerlär at yarışmalarını neredä, pay alȇrlar beygircilär Moldovanın türlü dolaylarından. Yakın 20 pay alan yarıştılar, ki kazanmaa en üüsek erleri hem kabletmää baaşışları. İki yıllık beygirlärlän yarışmada ilk eri kazandı Gennadiy Edinçuk, üç yıllık beygirlärlän İvan Sivoglo, dört yıllık Mihail Zlatov hem büük beygirlärlän Anatoliy Doniç, atlı beygirdä ilk finişa geldi Ştefan Çebotar.
Kırlannar küüyü bir günä oldu merkez nereyi geldilär diil sade küüyün yaşayannarı, ama musaafirlär dolay yaşamak erlerindän. Onnar geldilär birerdä kutlamaa klisä yortusunu hem tutturmaa at yarışmaların pay alannarını. Beygircilär toplandılar Moldovanın türlü dolaylarından, ki diil sade yarışmaa, ama göstermää kendi beygirlerini da. Professionallar hem sevennär yarıştılar beygirlärlän türlü yaşta iki yıldan yukarı. Nicä nışannadı hazırlaycı Vasiliy Tatar, angısı taa küöüktän sevärdi beygirleri hem tutardı onnarı, beygircilerin boorcu- bakmaa adetleri, angıları kaldılar bizä dedelerdän hem bizim uşaklarda onnarı vermää.
«Nicä nışannadı hergeleci Konstantin Keleş , Kırlannar küüyündä at yarışmaları geçirildilär taa ilerki zamannarda da, amma sora basıldı, da iki yıl nicä enidän bu adet başladı geçirilmää»,- nışannadı Vasiliy Tatar.
Konstantin Keleş hergeleci, söledi: «İsteerim sölemää , ani Kırlannar küüyü hepsinin sözündä, diil sade küüyün yaşayannarında, amma Moldovada da. Nekadar yarışmak geçirdik Başkan baaşışına, kilimnerin çoyunu hem baaşışları kazandınız siz. Tatar Grigiriyin topracıı olsun ilin olsun, o edi kerä taradı Başkan baaşışını. İki kardaşın beygirleri da 39 yaraştan 35 taradılar».
Nicä nışannadı GHT deputatı Nikolay Ormanjı, bölä insannarın hatırınnan, angılarını küüyün yaşaması dakgalandırȇr, bölä olaylar da geçerlär.
«Beygirlär- saygılı hayvannar, bizin düdular gezmäzdilär arabalarda, amma işlärdilär toprakta, musafirlää gidärdilär biri- birinä beygirlerdä, bunnar bizim adetlerimiz. Onnarı lääzım korumaa hem bizim uşaklara vermää, unukalara»,- nışannadı GHT deputatı Nikolay Ormanjı
Yarışmaların programmasına görä ilk denemää kendi kuvetlerini çıktılar iki yıllık beygirlär. Onnarın ardına üç hem dört yıllık beygirlär hem taa büük yaşta hayvannar, da kendi becermeklerini kaçmakta gösterdilär. Pay lannar urguladılar, ani olay geçti üüsek uurda, duygularda pek ii, çünkü konkurenţiya kaaviydi, hem belli edildi kim nicä işler kendi hayvanınnan.
«Kazandım üçüncü eri, istärdim taa ii».
«Büün yortu, da biz kazandık ikinci eri, bu pek ii bizä deyni, dalgalandık biraz, ne yapmaa bu sport».
«Büük duygular, ii kef».
«Bän çimişlidän, pay alȇrım Velikolepnaya beygirlän ikinci yıl, pek mutluyum ani o bölä çıkışları koyer».
Olayın süresindä siiredicileri hem musaafirleri şennendirdilär artistlär hem erli oyun kollektivi.
Yortunun sonunda geçti taa bir yarış atlı beygirlerdä. Bu diildi sade güreşmäk kubok için, ama andırdılar Grigoriy Tatarı, angısı geçindi, ama bütün yaşamasını balaadı beygirlärlän. Hepsi taraycılar kablettilär hazırlaycılardan diplomnarı, para baaşışlarını, atlı da kaçan taraycı taa kuboktan kaarä kuzuyuda.