Gagauziyada 2026-ci 2027-ci yıllarında koyulu plana eniletmää üüretim programaları gagauz dilindä, angılarına girerlär üüredicilär için becermekelrin kaldırmasında kursalar. Programanın büceti 2,2 million ley kurȇr.
Üüredicilär için becermekelrin kaldırmasında kursalar doorudulu genişletmää gagauz dilin kullanmasını. Onnar vereceklär kolaylık giriştirmää zamandaş üüretmek metodikaları, kaaviletmää dil praktikasını hem kaldırmaa üüretmek proţesin kalitesini. Bu iş için Dialog studiyada programasında GRT kanalında haberledi MD Üüretim ministerliin milletlär arası ilişkileri izmetin başı İvan Duminika: « Mardın 9-zundan ilk 50 gagauz dili hem literatiurada üüredici, angılar işleerlär gimnaziyalarda hem liţeylarda, geçäbileceklär bu kursaları iki asyın süresindä. Bitkidä onnar kabledeceklär sertifikatı Molodvanın üüretim ministerliindän hem KDU. Bu onnara yardımcı olacek didaktika uurların kabletmesindä».
İvan Duminika haberledi, ani KDU uzmannarı işlettirdilär programayi üüredicilerin hazırlanmasında, angıları gagauz halkın istoriya kultura hem adetleri predmetini götüreceklär.
«Pek önemniydi kursalara girsin soruşlar, angıları baalı gagauzların peydalanmasınnan, ilerlemesinnän Besarabiya teritoriyasında. İstoriyanın hepsi etapları. Biliner, ani gagauz halkın istoriya, kultura hem adetleri predmeti götürerlär gagauz dili üüredicileri. Onnar hazır bunu yapmaa, neçin ki ana dilindä lafederlär, ama kalkȇr soruş onnarın hazırlılıı için istoriyada. Da üüredicilär danıştırlar hazırlamaa bölä kursu»,- İvan Duminika haberledi.
Gagauz halkın istoriya, kultura hem adetleri predmettä üüredicilerin hazırlanmak kursalar avgust ayında çekedeceklär. Onnarı geçäbilecek 100 zeedä gagauz dili hem literatura üüredicisi.
«Bu onnara deyni eni da verecek kolaylık uzmannardan haberleri kabletmää, da üürenicilerä vermää»,- o nışannadı.
Üüredicilär için becermeklerin kaldırmasında kursalar geçeceklär KDU durgunmaz üüretmek merkezindä, neredä var koşullar profesional becermekelrin kaldırması için hem innovaţiya kolaylıkların giriştirmesi için.