Gagauziyada liţeyleri başarannarın 43% Bakalavr ekzaminnerindä «8», «9» hem «10» notalarını kablettilär. Bu üüretim kalitenin en üüsek uuru bitki yıllarda. Bu sayıları Gagauziya Üüretmäk bakanı N.Kristeva en ii başarannarı ödüllemäk yortusunda açıkladı.
Ţeremoniyanın süresindä Gagauz Eri Üüretim bakannıın başı Nataliya Kristeva çizgiledi, ani başarannarın bilgi kalitesi yıl-yıldan üüseler.
«Bu yıl başaranarın bilgi kalitesi — 43% kurȇr. Başarannarın 43% ekzamen işlerini 8, 9 hem 10 notalarına yazdılar. Hepsi ekzamen işlerinin sayısında 161 “10” notası var,, 159 — “9” notası hem dä 639 — “8” notası»,- Nataliya Kristeva çizgiledi.
Zeedelendi üüsek ödülleri kabledän başarannarın sayısı da, çizgiledi N.Kristeva. .
«Beş yıl geeri Bakannık komiteti Başarılı üürenicileri ödüllemäk için maasuz programayı kabletti. Bu yılların içindä ödülleri kabledän başarannarın sayısı 5 kereyä zeedelendi»,- Nataliya Kristeva çizgiledi..
Bu yılın bakalavra ekzamennerin sonuçlarına görä 1 altın, 16 gümüş medali verildi. Bu başarannar hepsi ekzamennerini sadecä 10 ya da sadecä 10 hem 9 notalarına verdilär. 23 üürenici Başkanın adından diplomaları kablettilär. Onnar ekzamennerdä 8, 9 hem 10 notalarını kablettilär. Bu üürenicilerä para ödülleri dä verildilär.
«Saa olunuz, ani bizä bu gözäl duyguları baaşlȇrsınız. Guruluyuz. İnanȇrız, ani sizi gelecektä taa büük hem gözäl başarılar beklerlär. Siz bizim avtonomiyamızın hem devletimizin yarın günüysünüz»,- Nataliya Kristeva çizgiledi.
Bu yıl Gagauz Erindä liţeyleri 454 üürenici başardı. Sıradakı etap — universitetlerä üürenmää girmäk. Dokumentleri kabletmäk proţesi iyulün 27-dä başlayacȇk. Abiturientlär danışmalarını onlayn veräbileceklär. Bunu eAdmitere devlet platformasında yapmaa yakışacȇk. İlk sonuçlar avgustun 8-dä belli olacȇklar. Sora apeläţiya hem dokumentlerin originallarını getirmäk proţesi olacȇk. Son çıkışları üüsek üüretim kurumnarı avgustun 14-dä bildireceklär.