Çadırda uşaklar için yaratmak merkezi geçirdi açık kapuların gününü — o bir yortu, angısı artık pek gözäl bir adet oldu uşaklar hem analar-bobalar için.
Yaradıcılık kolektivi barabar uşaklarlan hazırladı gözäl programayı. Çaldılar türlü dillerdä türküleri, oynadılar, gitarada çaldılar hem taa çok meraklı işleri gösterdilär. Bu yılın açık kapular günün teması «Avion reysi 2025-2026» üürenmäk yılın süresindä pek çok ideya, ihlam hem sevinmelik var. Uşaklar söledilär neçin gezerlär yaradıcılık merkezinä.
«Bän pek severim, burada pek islää insannar, uşaklar».
«Bu yıl taa iki çevreyä yazıldım, bana pek yakın geler yaratmak merkezi, üüredicilelerimiz da hep şen hem bizimnän bir uurda olêrlar».
«Gezerim merkezä artık üçüncü yıl, teatruya üürenerim hem türkü çalmaa. Pek severim üüredicileri hem plannêêrım taa başka çevrelerä yazılmaa».
Bölä yortunun baş neeti — kasaba yaşayannarına göstermää nekadar talantlı uşaklar dolayda hep ölä da teklif etmää eni üürenicileri. Burada parasız uşaklar zanaatlanêrlar.
Elena Danacı, yaradıcılık merkezin başı, nışannadı: «Herbir uşaan var becermekleri hem talantı. Buz burada, ki o talantları açmaa hem ilerletmää. İsteerim şükür laflarını Çadır dolayın administraţiya başına sölemää, ki o bizä herzaman yardım eder».
Yortunun musaafirleri tanıştılar çok türlü yaradıcılık çevrelerinnän,ani var bu merkezdä — türkü çalmak, gimnastika, kukla teatrusu, resimnemäk, ellän yapmak, moda, foto hem taa başka çevrelär.