Komratta «А ну-ка, девушки!» yaraşması geçti. Kultura Evindä pay alannar diil sade kendi gözelliini, ama fikirin zenginniini da gösterdilär.
«А ну-ка, девушки!» yaraşmasında pay aldılar genç kızlar avtonomiyanın türlü yaşamak erlerindän. Onnar kendini gösterdilär birkaç etapa görä — yaradıcılık uurunu, cuvap ettilär soruşlara hem açıklandılar siiredicilerä kendi becermeklerini. Herbiri savaştı göstermää jüri azalarına kendi özelliini. Konkursun çıkışlarına görä, jüri nışannadı, ani hepsi üüsek uurda hazırlanmış hem belli etti tarayannarı. Komrat kasabasının primar yardımcısı hem jüri azası Stepan Kara şükür etti kızları, ani onnar pay aldılar konkursta, nışannayıp herkezin becermeklerini.
«Herbir kız hazırlanmiş 100 prozentä, onuştan bän pek sevinerim, ani bizdä en becerikli kişilär, en talantlı gençlär»,- Stepan Kara söledi.
Bu Konkurs taa bir keret gösterdi — şindiki kızlar diil sade gözäl, ama talantlı , akıllı hem kendilerini sigur duyêrlad, söledi jüri azası, Gagauziyanın şannı jurnalisti Ekaterina Terzi.
« İlk ne sölemää isteerim, kızlar, siz ölä gözälsiniz, ölä gülär üzlüysünüz. Siz pek girginsiniz, neçin ki kendiniz teklif ettiniz geçirmää konkursu, pek çok hazırlandınız. İstediniz en ii taraflarınızı göstermää. Girginsiniz, ani bizimnän barabar bu sţenadaysınız»,- Ekaterina Terzi nışannadı.
İrina Melkan, jüri azası hem vokal üüredicisi urguladı, ani kızlar pek islää hazırlanmışlar.
« Kızlar, pek meraklı herbirinizä bakmaa, siiretmää, sizin gözleriniz yalabıyêr, ko olsun bölä bütün yaşamak yolunuzda»,- İrina Melkan sayȇr.
Konkursta 9 genç kız pay aldı. Onnara diplomnarı hem baaşışları verdilär.