Gagauz Eri Bakannık komiteti S.Topal adına üüretim uurunda garantların ödemesi için kararı kabletti. Finans yardımını 65 student kabledecek. Annaşmaya görä bu studentlerä avtonomiya üüretim kontraktlarını ödemää yardım eder, onnar sa uzmannık diplomnarını kablettiktän sora Gagauz erindä işlesinnär lääzım. Erindeki kuvetlär adȇrlar, ani onnara deyni iş erleri olacȇk. Er genç uzman işä girmää istämärsä o üürenmäk yılların süresindä ona verilän paraları geeri bücetä çevirsin lääzım. Butakım grant programasının temel kuralları.
Gagauz Eri Bakannık komiteti S.Topal adına üüretim uurunda garantları kabledän studentleri̇n li̇stesi̇ni̇ kabletti̇. Hep ölä kabledildiläт para sayıları belli edildilär. Tezlää üüretim bakannıı grantları kabledän studentlerin bank esaplarına paraları geçirecek. Maasuz dokumentä hem annaşmaya görä bu iş yılda iki keret yapılȇr. Universitettä bir yılın süresindä üürenmäk için lääzım olan paranın yarısı oktäbrinin 20-nädän geçiriler, ikinci payı da fevralin 20-nädän.
Nataliya Kristeva, Gagauz Eri Üüretim bakanı, söledi: «Grandın 2-ci payını kabletmäk için bu studentlär maasuz dokumentleri yollasınnar lääzımdı. Hepsi onnar bunu yaptılar hem bildilär, ani onnar kendi universitetlerindä hep taa student sayılȇrlar. Bu sayıda 65 student var. Onnarın önündä bizim borcumuzu yapmak için 751 240 ley lääzım. Bu paralar Gagauz Eri bücetindä bakılı».
Gagauz eri bücetindän S.Topal adına üüretim uurunda garantları kabledän studentlär Moldova devleti Mediţina hem farmaţiya universitetindä, Tehnika universitetindä, Muzika, teatru hem incäzanaat akademiyasında hem dä KDU üürenerlär. N.Kristeva çizgildei, ani ayırı yardımı Gagauz eri bücetindän KDU studentleri kablederlär. 2016 yıldan 2020 yıladan S.Topal adına stipendiyalarını ödemäk için 1 724 000 ley verildi. 2021 yıldan 2025 yıladan üüretim grantların bütün sayısı 659 940 ley kurdu.
«Bundan kaarä 2021-ci yıldan beeri KDU studentleri, angıları gagauz dili hem literaturası üüredicisi zanaatını kablederlär maasuz stipendiyaları kablettilär. Bu uura 1 345 200 ley bücettän verildi. KDU studentlerini tutturmaa deyni verilän paraların bütün sayısı 3 729 100 ley kurȇr»,- üüretim bakanı urguladı.
S.Topal adına üüretim uurunda garantlar programası kurulduktan beeri 32 genç uzman artık üürenmelerini başardılar da Gagauz Erindä zanaatlarına görä işleerlär.