Bir-iki yıl geeri insannarın çoyu her yıl gidärdilär dinenmää, büün sä onnar ilktän plannȇȇrlar etişecek mi para bu neetlerä, söleerlär Avtonomiyanın yaşayannarı. Okadarki heptän brakılmaa dinnenmektän onnar neetlenmeerlär. Nereda plannȇȇrlar Gagauziyanın yaşayannarı dinnenmää bu yıl hem nesoy devletleri ayırȇrlar.
Bakmadaan ona, ani turların paası büüdü, meraklık gezintilerä hem dinnenmeya Avtonomiyanın insannarın aralarında kalȇr, nışannȇȇrlar turistik agenstvoların uzmannarı. Onnarın laflarına görä, yaşayannar taa çok aarȇrlar taa uygun cümleleri hem plannȇȇrlar onnarı ilerdän. Nicä nışannȇȇr turistik agenstvonun temsilcisi Elena Gerçu, insannarın sayıları, angıları isteerlär dinnenmää aşırıda, aazalmȇȇr, bakmadaan ona, ani onnarın paası büüyer orta 10-20 proţendä.
«Şindi paalar zeedelener her yıl 10-20 %. Bizim insannar savaşȇrlar taa çok ilerdän almaa turları, çoyu diil bir yıl bölä yapȇr- bu insannar, angıları işleerlär büdjet sferasında da onnarda var maasuz datalar, açan onnar alȇrlar dinnenmäk zamanını. Taa çok insannar ayırȇrlar Türkiye, Bulgariya devletlerini, all inclisive -Turţiya, paa-kalitä- Bulgariya, taa çok insannar başladılar Greţiyaya gitmää, peydalanȇr eni marşrutlar, Zanzibar, Egipet, maasuz ayırȇrlar bu kış onnarı»,-turistik agenstvonun temsilcisi Elena Gerçu nışannȇȇr.
Nicä Gagauziyanın yaşayannarı neetlenerlär dinnenmää bu yıl, hem var mı onarın kolaylıkları aartırmaa aylä büdjetındän paraları dinenmää deyni hem nereyi neetlenerlär gitmää, biz üürendik onnardan.
«Bän düşünmeerim, ani 4 bin leyä var nasıl nesä almaa, neçinki putövkalar pek paalı. Ama te onnarın, kimin var kolaylıkları hem diil ölä büük harcamakaları, kolay giderlär dinnenmää. Bän düşünerim, ani kararlayaydık kocamnan nereyi sä gitmää, o olaceydı erindä, neredä sä gezinmää, gitmää baseynaya, erlem sölärsäk aşırı devletlär için- yok kolaylık. Bän şimdi çıkardım para da giderim ilaç almaa»
«Bän düşünerim, ani bakmadaan ona, ani paalar kalkȇrlar, insannar alışȇrlar da herbiri bakȇr kendi cöbünä görä. O var nicä gitmesin dinnenmää. Bän düşünerim, ani hepsi çekiler kendi insandan. İlerdän olmȇȇr, açan vakıt etişer dinenmäk vakıdına, ozaman onar kararlȇȇrlar nereyi sä gitmää, çekederlär aaramaa variantları kendi kolaylıklarına görä. Er laf gider dinenmää yazın- bu derenin boyunda ii yapmaa. Türkiye- ii variant, var Horvatiya, angısı taa ucuz. Greţiya, ama orada taa paalı”.
«Er aşırıya — ozaman zor, lääzım aaramaa ta neredä kazanmaa, ki nereyi sä gitmää. Erlem yavaş-yavaş aartırarsak , ozaman var nasıl toplamaa para dinenmek için. Ama genä çekiler bizim istemeklerimizdän. Erlem insan yaşȇȇr borçsuz hem o saalıklı hem var nasıl çalışsın hem kabletsin parasını- ozaman var kolaylıı gitmää. İşideriz Egipet için, Dubay. Ama orayı taa gidämeeriz».
«Bän işleerim primariyada, kendi yaşamak erimdä da benim yok kolaylıım gitmää dinenmää nereyi sä, var başka işlerim, angılarına lääzım harcamaklar. İslää, ani karım da çalışȇr da etişer paramız. Bizim erli turizm da pek paalı, bän demeyecäm, ani o taa ucuz, nekadar Rumıniyada».
«Bölä paalarlan eter sade komunal koşullarına, hem imek alma»
«Sade yazın, açan olmayacek bölä paalar gaza hem şavka, biraz toplamaa para».
2025 yılın çeketmesindän ceviz ayınadan haberlerä görä turistik agenstvoları kablettilär 480 bin kişi, ne 6,5 proţendä taa çok, nekadar hep bu vakıt 2024 yılda, okadarki 336 bin keret insannar aşırıya gittilär, 78 bin da devletin içindä.