2019 – cu yıldan beeri Çöşmäküündä çalışȇr musaafirlik evi. Onun çorbacısı bu yaşamak erin yaşayanı Dmitriy Yanul. Nesoy neetlän açıldı bu millet kultura köşesi hem da kim taa sık orayı geler üürendi Polina Barbova.
İdeya açmaa deyni kendi duuma yaşamak erindä, Çöşmäküündä, musaafirlik evini bu küüyün yaşayanında Yanul Dmitriydä peydalandı çoktan. Buna örnek gibi oldu malisinin evi, angısında vardı çok evelki tertiplär. Dmitriy meraklandı, neredä hem da nicä onnarı kullandılar. O vakıttan o kararladı yapmaa musafiirlik evini, da kabletmää orayı musaafirleri, angılarına olacek meraklı görmää hem da yakından tanışmaa gagauz halkın yaşamak tertiplerinnän.
«Geçip yıllar, biz satın aldık bu evi, da nicä herbir gagauzda, moldovanda var «Casa Mare» büük ev hem da küçük ev, neredä hepsi yaşȇȇrlar. Da te bu küçük evdä biz bulduk eski kilimneri, millet dokumalarını hem da eski patretleri. Da te ozaman biz düşündük da kararladık hepsi bunnarı kullanmaa, da yapmaa musaafirlik evini»,- Dmitriy nışannadı.
İlk insannarı Çöşmäküün musaafirlik evi kabletti 2019 – cu yılda. Bu aylä Daniyadan geldiydi, getirer aklısına Dmitriy. Büünkü günnerädän musaafirlik evindä bulundular dünnenin 10 devletindän zeedä temsilcileri.
«Bizdä bulundular Daniyadan, Şveţiyadan, en çok Almaniyadan, Velikobritaniyadan, Runıniyadan, Ukrainadan, Gollandiyadan geldilär birkaç sıra, Şveyţariyadan hem da başka devletlerdän. Ne siz var nasıl nasaat edäsiniz onnara? Biz barabar var nasıl oturalım avşam imesini barabar iyelim sofrada, lafa duralım, barabar var nasıl işimizi yapalım. Erli onnara meraklısaydı, barabar onnarlan gidelim muzeya, göstermää onnara bizim küüyün paalılıklarını hem da zenginniklerini, komuşu küüyülerinä gitmää. Da hepsi bunnar musaafirlerä pek meraklı»,- Dmitriy Yanul çizgiledi.
Çöşmäküüyün misaafirlik evindä var kolaylık tanışmaa gagauz halkın kulturasınnan, Dmitriy Yanul çizgiledi: «Var öleleri dä, angıları gelerlär birkaç sıra, var bizdä onnarın kontaktları, angıları meraklanȇrlar bununnan. İki musaafir bizi teklif ettillär gitmää onnara Gollandiyaya hem Şveyţariyaya. Onun için – bu pek meraklı».
Altı yılın süresindä Çöşmäküüyün musaafirlik evindä bulundular 70 zeedä insan, haberledi musaafirlik evi çorbacısı Dmitriy Yanul.
«Herbiri onnardan bulundular bir parça vakıt aşırı, kimisi bir günä, kimisi iki – üç gün bulunȇrlar, var öleleri da, angıları bulundular 5 gündän 20 günä kadar, bir kişi 3 ay burada yaşadı. Bütündän – bu 2-3 gün. İnsan sora gider tanışmaa başka erlärlän dä»,- Dmitriy Yanul urguladı.
Dmitriy çizgiledi, ani olmaa musaafirlik evin çorbacısı – bu unikal kolaylık pay olmaa kendi halkın meraklı kulturasınnan, annatmaa Moldova devleti için bütündän.