Kasım ayın 27-dä GHT deputatları 8-ci çaarışın seçimnerini geçirmäk gününü belli etmäk soruşunu baktılar. Angı data kabledildi annadılȇr süjetimizdä.
Oturuşun süresindä GHT reglament, imunitet hem deputatlar etikası komissiyasının başı Vladimir Kıssa bakılmaya iki datayı teklif etti. Birisi 2026-ci yılın baba mata yayın 15-şi, ikinci data 2026-ci yılın baba marta ayın 22-si.
Vladimir Kıssa GHT reglament, imunitet hem deputatlar etikası komisiyasını başı: «Mardın 8-nä koymayacez, neçinki o günü halklararası karılar gününü bakȇrız. Kalȇr ya baba marta ayın 15-şi, yada baba marta ayın 22-si. Biz herbir işi sırasınca yapmaa etiştirelim deyni, MSK işlemää başlasın deyni teklif ederim ayıralım baba marta ayın 22-ni. Kabledelim seçimnär günü kararını».
Dartışmaklar süresindä deputatlar taa birkaç data teklif ettilär. Deputat Pötr Fazlı 2026-cı yılın hederlez ayın 10-da seçimneri geçirmää teklif etti.
Pötr Fazlı, GHT deputatı, teklif etti: «Bendä var bir teklif. Teklif ederim datayı hederlez ayın 10-na. Sayȇrım, ani bu pek uygun bir gün yaşayannara deyni olacek, havalar yısınaceklar, hepsi yortular geçeceklär. Sayȇrım, ani ozamanadan MSK soruşu da uygun açıklanacek».
GHT öndercisi işini götürän Nikolay Ormanji açıkladı, neylän baalı o, ani seçimnerin geçirilmesi için baba marta ayın 22-si teklif edildi.
«Biz 2025-ci yılın dekabr ayın 22-nä kadar barabar lääzım işleyelim , kuralım MSK, başladalım onun işini. Onnarda lääzım organizaţiya işlerinä deyni bir ay vakıt olsun, da büük ayın 15-dän onnar imza yapraklarını vermää hem kandidatları sayıya koymaa başlasınnar»,- Nikolay Ormanji açıkladı.
GHT deputatı Mihail Jelezoglo nışannadı, ani büünkü HT işlemäk zamanı başarıldı hem seçimnär şansora lääzımdılar geçirilsinnär.
«Taa bir sıra aklınıza getireriz, ani taa bir yıl geeri Biz Aleksandr Grigoryeviçlän barabar bu soruşları bakmaya teklifinnän çıktıydık. Biz bu seçimneri lääzımdı şindiyädän geçirelim. Bizim iş zamanımız deputat olarak kasın ayın 12-dä başarıldı. Biz 4 yıla seçileriz. Onuştan biz lääzım bakalım kanona da en yakışıklı hem yakın datayı seçimnär için kabledelim»,- Mihail Jelezoglo nışannadı.
Gagauziya Bakannık Komiteti başı ilk yardımcısı İlya Uzun nışannadı, ani HT var hakı kabletmää günü, ama esaba lääzım alınsın vakıt MSK kurmaya hem onu işletmää başlamaya vakıdı.
«Seçimnär geçirmesi gününü kanona görä sade Halk Topluşu kabletsin lääzım, ama esaba lääzım alınsın vakıt MSK kurmaya hem onu işletmää başlamaya vakıdı. Onu kurmaa deyni hem işletmää deyni vakıt lääzım olsun. Angı datayı büün kabledeceniz martın 22-ni mi, osa hederlez ayın 10-nu mu- bu sade sizin hakınız»,- İlya Uzun nışannadı.
Oturuşun süresindä deputatlarlan iki data teklif edildi. Birisi 2026-ci yılın baba mata ayın 22-si-bu data için kendi seslerini 15 kişi verdilär, ikinci data 2026-ci yılın hederlez ayın 10-nu-bu data için 11 deputat seslerini verdilär. Bölä HT VIII-ci çarışın seçimneri 2026-cı yılın baba marta ayın 22-dä geçirileceklär.