Gagauziyanın agrariyaları eni organik tehnologiyalarınnan tanışȇrlar.
Zararı getirän böceklerdän nicä kurtulmaa, topraan hem suyun kalitesinä diagnostikayı yapmaa metodlar hem himiyaylan büümneri taa ȇfektiv nicä büütmää seminarda annatılar. Olay Komratta geçti.
Аgrariyalar mutlaka ȇkologiya kolaylıklarını çiftçilik çorbacılıklarında düşer kullansınnar, söledi Kişinövun ȇkologiya merkezin administratoru Маrius Mokanu. Neçin bunu lääzım yapmaa da açıkladı.
«Fermerları, çiftçiliklertin öndercilerini isteeriz haberlemää eni ȇkologiya metodları için, ki çorbacılıklar doludan berekedi alsınnar. Buna kadar Komratta seminar geçirildiydi, neredä annattık, nicä kulturaları zararcılardan korumaa, şindi bizdä başka tema, ama o da önemli»,- söledi Marius Mokanu, ȇkologiya merkezi administratoru.
Gagauziya çiftçilik bakannıı büümnär, hayvancılık bölümü başı Silviya Tomaylı agrariyaların butakım buluşmakların sorumnuunu belli etti.
«Bu üüretmäk sesiyası verecek kolaylıı taa az himiya gübürlemesini kullanmaa, taa az himiyayı büümnerdä, toprakta kullanmaa»,- annattı Silviya Tomaylı.
Seminarın pay alanı Elizaveta Pȇkuraru annattı, neçin buluşmaya katıdı.
«Ȇko-mallarınnan lääzım üürenelim işlemää hem sezonun çeketmesindän»,- dedi Elizaveta.
Üüretmäk seminarı kocaman seminarların taa biri, neredä agrariyalar bilgilerini edinerlär, ki korkunçsuz metodları çifçilik çorbacılıklarında olur kullansınnar.