Gagauziya artistleri Evdokiya hem İlya Kösä «Vostoçnıy bazar» Halklararası muzıka festivalin pay alanı oldular. Oluş Tatarstanın Kazan kasabasında geçti, angısı türlü devletlerin hem regionnarın artistlerini birleştirdi.
Evdokiya hem İlya Kösä kendi yaradıcılıında halk motivlerini hem zamandaş ȇstradasını birleştirän türkücülük duȇtı anılȇrlar. Halklararası «Vostoçnıy bazar» muzıka festivalindä onnar bu yıl Gagauziyayı temsil ettilär. Sţenaya Evdokiya hem İlya «Birlik» türküsünnän gagauz dilindä çıktılar. Yaratma geçän yıl «Eni türkü» yarışmasında en ii tekst için bildirildiydi.
««Vostoçnıy bazar» festivalin sţenasında «Birlik» avtorluk türkümüzü çaldık. Onu nay instrumentindä avaylan çeketmedä enilettik».
«Bu türkü geçän yıl «Eni türkü» yarışmasında nominaţiyada en ii laflar ilk oldu».
Evdokiya hem İlya Kösä belli ederlär, ani gagauz kulturasını kendi yaradıcılıından savaşȇrlar ilerletmää. Bu kolaylık verildi Halklararası sţenasından da bunu yapmaa.
Evdokiya Kösä türkücü: «Halklararası sţenasına çıkmak bizä deyni seftä oldu. O bizi kuvetleştirdi hem havezi ilerletmää yaradıcılıımızı verdi».
«Vostoçnıy bazar» festivalindä türlü devletlerin hem regionnarın artistlerini başka-başka uurlardan birleştirdi. Sţenadan hem auditoriyadan kaarä, Evdokiya hem İlya eni muzıka denemeklerini aklılarında tuttular.
İlya Kösä türkücü, muzikacı: «Sţena ardında taa bir dünneyi yaşadık. Artistlärlän muzıka avalarını kurduk, çünkü kultura milletleri birleştirer».
«Vostoçnıy bazar» festivali 2022-ci yılda türk ȇstrada oluşu gibi başladıydı. Zamannan festival Halklararası uurunadan büüdü. Programada — konţertlär, oyunnar, muzıka nomerleri, konferenţiyalar, halk hem ȇstrada muzıkası.